ธมฺมญฺหิ สีลมมลํ ปริปาลยนฺตี; ลทฺธาน เนกวิภวํ วิภวํ ปยาตา, มา โภ ปมชฺชถ สทา กุสลปฺปโยเคติฯ กญฺจนเทวิยา วตฺถุํ จตุตฺถํฯ 15. พฺยคฺฆสฺส วตฺถุมฺหิ อยมานุปุพฺพีกถา ชมฺพุทีเป จูลรฏฺฐา สนฺเน พาราณสีนคเร เอกํ ปํสุปพฺพตํ วินิวิชฺฌิตฺวา มหามคฺโค โหติ, ตตฺถ เวมชฺเฌ เอโก พฺยคฺโฆ อตฺตโน อนฺธปิตรํ ปพฺพตคุหายํ กตฺวา โปเสนฺโต วสติฯ ตสฺเสว ปพฺพตสฺส วนทฺวาเร ตุณฺฑิโล นาม เอโก สุวโปตโก รุกฺขสฺมิํ วสติฯ เต อุโภปิ อญฺญมญฺญํ ปิยสหายา อเหสุํ, ตสฺมิํ สมเย ปจฺจนฺตคามวาสี เอโก มนุสฺโส อตฺตโน มาตุคาเมน สทฺธิํ กลหํ กตฺวา พาราณสิํ คจฺฉนฺโต ตํ วนทฺวารํ สมฺปาปุณิฯ อถ สุวโปตโก ปริหีนตฺตภาวํ ทุกฺขิตํ ตํ ทิสฺวา กมฺปมานหทโย ตํ ปกฺโกสิตฺวา โภ กุหิํ คจฺฉสีติ อาห, เตน ปรขณฺฑํ คจฺฉามีติ วุตฺเต ตุณฺฑิโล โภ อิมสฺมิํ วนขณฺฑมชฺเฌ เอโก พฺยคฺโฆ วสติฯ กกฺขโล ผรุโส สมฺปตฺตสมฺปตฺเต มาเรตฺวา ขาทติฯ มา ตฺวํ เตน คจฺฉาติ อาหฯ สฺวายํ ทุพฺภโค มนุสฺโส หิตกามสฺส ตสฺส วจนํ อนาทิยิตฺวา คจฺฉาเมวาติ อาหฯ ตุณฺฑิโล เตนหิ สมฺม ยทิ อนิวตฺตมาโน คจฺฉสิฯ เอโส พฺยคฺโฆ มม สหาโยฯ เม วจนํ ตว สนฺติกา สุตฺวา น คณฺหาตีติฯ ตสฺส ตํ อนาทิยนฺโต โส สุวราเช ปทุฏฺฐจิตฺโต มุคฺคเรน ปหริตฺวา มาเรตฺวา อรณิํ อคฺคิํ กตฺวา มํสํ ขาทิฯ อสปฺปุริสสํสคฺโค นาเม ส อิธ โลกปรโลเกสุ ทุกฺขาวโหเยวฯ ตถาหิฯ |